سافٹ ڈرنکس بنانے والے بڑے اداروں نے گزشتہ چند سالوں میں پاکستان میں بھی اپنی چند نئی مصنوعات بھی پیش کی ہیں جن میں معدنی پانی (mineral water) اور پھلوں کے رس (juices) کے علاوہ snacks تک شامل ہیں۔ اس حیران کُن تبدیلی نے ذہنی طور پر اس بارے میں کچھ تحقیق پر آمادہ کیا کہ اس کی وجوہات کیا ہیں؟

اب آپ یہ “نام نہاد تحقیق” ملاحظہ کیجیے جو انٹرنیٹ پر متعلقہ موضوعات کی تلاش کا نتیجہ ہے۔ اس سلسلے میں تبصرہ نگار بھی اپنی معلومات شیئر کرنا چاہیں تو مجھے بہت خوشی ہوگی۔

کاربونیٹڈ سافٹ ڈرنکس گزشتہ کئی دہائیوں سے نوجوانوں کے دلوں پر ان کے پسندیدہ کھلاڑیوں اور اداکاروں کے ذریعے راج کرتی آ رہی ہیں اور آج بھی “نیا جال لائے پرانے شکاری” کے مصداق یہی طریقۂ کار استعمال کیا جاتا ہے لیکن ………………………

کیا سنہرے دن اب صرف یادوں کی صورت میں ہی رہ گئے ہیں؟ کیونکہ کم از کم مغربی ممالک کی حد تک تو سافٹ ڈرنکس تیار کرنے والے اداروں کو “کاربونیٹڈ سافٹ ڈرنکس” میں اپنا مستقبل نہیں دکھائی دیتا۔ کیونکہ صحت عامہ کے ماہرین گزشتہ دو دہائیوں سے سافٹ ڈرنکس کے انسانی صحت پر مضر اثرات کے حوالے سے عوامی شعور اجاگر کرنے میں مصروف ہیں اور اب لگتا ہے کہ جلد ہی سگریٹ کی ڈبیہ کی طرح سافٹ ڈرنک کی بوتلوں پر بھی “صحت کے لیے مضر ہے” جیسے الفاظ درج ہوں گے

سافٹ ڈرنکس کے صحت پر اثرات کے حوالے سے رپورٹس سامنے آتے ہی 90ء کی دہائی کے اوائل سے ہی “جنم بھومی” امریکہ میں سافٹ ڈرنکس کا استعمال کم ہونا شروع ہو گیا اور اب یہ صنعت مسلسل روبہ زوال ہے بلکہ گزشتہ دو سالوں سے تو اس زوال میں مزید تیزی آ رہی ہے۔ Beverage Digest کے مطابق امریکہ میں کاربورنیٹڈ سافٹ ڈرنکس کی مارکیٹ میں حجم کے اعتبار سے 2007ء میں 2.3 فیصد کمی آئی جبکہ 2006ء میں یہ کمی 0.6 اور 2005ء میں 0.2 فیصد تھی۔ ان اعداد و شمار میں انرجی ڈرنکس بھی شامل ہیں البتہ معدنی پانی، اسپورٹس ڈرنکس، تیار شدہ چائے وغیرہ شامل نہیں۔ حالانکہ جریدے کے مطابق اس کاروبار کے حجم میں 2.7 فیصد اضافہ ہوا ہے اور اب یہ امریکہ میں 72 ارب ڈالرز کی صنعت بن چکا ہے لیکن اس کی وجہ بھی روایتی مشروبات کی قیمتوں اور انرجی ڈرنکس کی فروخت میں اضافہ بیان کی جاتی ہے، اور کاربونیٹڈ سافٹ ڈرنکس کا اس اضافے میں کوئی کردار نہیں۔ ان تازہ اعداد و شمار کے باوجود امریکہ دنیا میں سب سے زیادہ کاربونیٹڈ سافٹ ڈرنکس استعمال کرنے والا ملک ہے اور دنیا بھر میں سافٹ ڈرنکس کا 55 فیصد امریکہ میں استعمال ہوتا ہے اور ایک اندازے کے مطابق ہر امریکی سال میں 576 سافٹ ڈرنکس پیتا ہے یعنی روزانہ ڈیڑھ سے زائد۔

اس امر میں تو کوئی شبہ نہیں کہ سافٹ ڈرنکس صحت کے لیے نقصان دہ ہیں۔ سب سے پہلا نقصان تو یہ ہے کہ سافٹ ڈرنکس کے “عادی” افراد زیادہ صحت مند مشروبات جیسے پانی، دودھ اور جوسز وغیرہ سے محروم رہ جاتے ہیں اور طبی تحقیق نے یہ بھی ثابت کیا ہے کہ یہ کئی بیماریوں کی جڑ ہیں جن میں مٹاپے اور ذیابیطس جیسے خطرناک امراض بھی شامل ہیں۔

ماہرینِ طب کے مطابق سافٹ ڈرنک نہ پینے والے بچوں کے مقابلے میں اسے استعمال کرنے والے بچوں میں مٹاپے کی شرح کہیں زیادہ ہے جس کا بنیادی سبب سافٹ ڈرنک پینے کے باعث زیادہ بھوک لگنا اور مشروب میں چینی کا استعمال ہے۔ ایک اندازے کے مطابق روزانہ 330 ملی لیٹر کا ایک کین پینے کا مطلب مہینے میں ایک پاؤنڈ وزن کا اضافہ کرنا ہے۔

2004ء میں ہونے والی ایک تحقیق نے ثابت کیا کہ روزانہ ایک یا اس سے زائد سافٹ ڈرنک پینے والے افراد میں ذیابیطس ہونے کے امکانات اُن افراد کے مقابلے 80 فیصد زیادہ ہوتے ہیں جو مہینے میں صرف ایک مرتبہ یہ مشروب پیتے ہیں۔

بینزین سرطان کا باعث بننے والا ایک عنصر ہے اور اس امر کے واضح شواہد موجود ہیں کہ کم از کم 1990ء تک بڑی سافٹ ڈرنک کمپنیاں اسے اپنے مشروبات میں استعمال کرتی رہی ہیں۔

2006ء میں برطانیہ کی فوڈ اسٹینڈرڈز ایجنسی نے سافٹ ڈرنکس میں بنزین کی سطح کا اندازہ لگانے کے لیے ایک سروے کیا اور 150 مصنوعات کا جائزہ لیا گیا جس کے نتائج کے مطابق 4 میں بنزین کی سطح عالمی ادارۂ صحت (ڈبلیو ایچ او) کے معیار سے زیادہ تھی۔ بہرحال بنزین کا استعمال اب قصۂ پارینہ بن چکا ہے لیکن ترقی پذیر ممالک میں اس خطرناک عنصر کی سافٹ ڈرنکس میں شمولیت سے قطع نظر نہیں کیا جا سکتا۔

سافٹ ڈرنکس ایک سے زائد تیزابی عنصر شامل ہوتے ہیں جن میں فاسفورک اور سٹرک ایسڈ عام ہیں۔ علاوہ ازیں بغیر کولا کے مشروبات اور کین میں بند “چائے”میں بھی میلک، ٹارٹیرک اور دیگر نامیاتی تیزابی عنصر شامل ہوتے ہیں جو دانتوں کے لیے بہت نقصان دہ ہو سکتے ہیں۔ اسی لیےسافٹ ڈرنکس سب سے زیادہ دانتوں کو متاثر کرتی ہیں۔ اب معالجین اسے اسٹرا کے ذریعے دانتوں سے لگائے بغیر براہ راست نگلنے کا مشورہ دیتے ہیں علاوہ ازیں وہ اس کی تیزابیت کے باعث پینے کے فوراً بعد دانتوں کو برش کرنے سے بھی منع کرتے ہیں کیونکہ اس کے نتیجے میں دانتوں پر موجود حفاظتی تہہ کے ضائع ہوجانے کا اندیشہ ہوتا ہے کیونکہ وہ اس تیزاب کے نتیجے میں نرم پڑ جاتی ہے۔

ایک رپورٹ کے مطابق سافٹ ڈرنکس میں شامل کیفین کے باعث یہ نیند کو بھی متاثر کرتی ہے اور نیند کی کمی کے باعث طبیعت مضمحل رہتی ہے۔

اس کے علاوہ چند واقعات بھی سافٹ ڈرنکس کی “شہرت” خراب کرنے کا باعث بنے جن میں سب سے اہم حالیہ سالوں میں ہی بھارت میں پیپسی اور کوکا کولا کے بطور کیڑے مار دوا کے استعمال کا واقعہ تھا۔ اس کے نتیجے میں چند ریاستوں میں تو اس کےاستعمال پر مکمل پابندی بھی عائد کر دی گئی تھی۔ ایک بڑی مارکیٹ میں اس طرح کی صورتحال کا پیش آنا دونوں بڑی کمپنیوں کے لیے ایک بھیانک خواب سے کم نہ تھا اور اس سے نکلنے کے لیے انہیں بڑے پیمانے پر اشتہاری مہم چلانا پڑی لیکن بہرحال “چُنری کو داغ” لگ چکا تھا اور اس سے پیچھا چھڑانا اب ناممکن تھا۔

یہ تمام صورتحال منظر عام پر آنے کے بعد کمپنیوں کو اس امر کا ادراک ہو گیا کہ انہیں نئی مارکیٹوں کی تلاش کے علاوہ آہستہ آہستہ “صحت بخش مشروبات” کی جانب منتقل ہونا ہوگا اور انہوں نے فی الفور دونوں اہداف کے حصول کے لیے اقدامات شروع کر دیے۔

ان اداروں کی سب سے بڑی مارکیٹ کیونکہ امریکہ اور یورپ ہیں جہاں صحت عامہ کے حوالے سے عوام باشعور ہیں ، اس لیے اعداد و شمار تو واضح کرتے ہیں کہ وہاں سافٹ ڈرنکس کے استعمال میں بدستور کمی آتی جا رہی ہے اور اگلی ایک دہائی میں سافٹ ڈرنکس کا استعمال انتہائی محدود رہ جائے گا۔ اس لیے سب سے پہلے تو سافٹ ڈرنکس تیار کرنے والے اداروں نے شمالی افریقہ، مشرق وسطٰی اور جنوبی ایشیا کی نئی مارکیٹوں پر اپنے قبضے کے مستحکم کیا اور اپنی مصنوعات کی زیادہ سے زیادہ تشہیر کی اور اس کے لیے اداکاروں، اداکاراؤں اور کھلاڑیوں کا سہارا لیا۔

دوسری جانب انہوں نے مغربی دنیا میں معدنی پانی اور پھلوں کے جوسز کے کاروبار پر توجہ مرکوز کر لی۔ پیپسی نے “Aquafina” نامی معدنی پانی مارکیٹ میں متعارف کروایا تو کوکا کولا “Kinley” لے آیا۔ آخر الذکر Minute maid کے ساتھ جوس مارکیٹ میں لایا تو اول الذکر نے Tropicana Twister متعارف کرادیا۔ حتٰی کہ اب Kurkure جیسے برانڈز تک متعارف کرانا پڑ رہے ہیں تاکہ متبادل ذرائع سے آمدنی کو سہارا دیا جاسکے یا بڑھایا جا سکے۔

تو کیا یہ لگتا ہے کہ اگلی ایک دہائی میں سافٹ ڈرنکس کا خاتمہ ہو جائے گا؟

وطن عزیز پاکستان میں “روشن خیالی” کے نام پر جو کارنامے انجام دیے جا رہے ہیں ان کے بھیانک اثرات بہت جلد نظر آنا شروع ہوں گے۔ اس سلسلے میں میں پہلے بھی ذرائع ابلاغ کو کردار کو نشانہ بناتا رہا ہوں اور تنقید کا یہ سلسلہ مزید طویل ہو کر آج اس پوسٹ کی صورت میں آپ کے سامنے آ رہا ہے۔

پاکستان میں خاص طور پر انگریزی صحافت روشن خیالی کے قافلے کا ہراول دستہ ہے۔ وہ اخبارات ہوں یا انگریزی اخبارات کے زیر نگیں چلنے والے انگریزی و اردو ٹیلی وژن چینلز، ان تمام کا بنیادی ہدف عوام میں دین سے دوری اور ملک کے مستقبل کے حوالے سے ناامیدی پیدا کرنا ہے۔ اور ان دونوں بنیادی اہداف کی تکمیل میں کوشاں ذرائع ابلاغ کو ہم روزانہ دیکھتے ہیں اور اس کے لیے کسی ثبوت کو پیش کرنے کی ضرورت بھی نہیں بلکہ یہ روز روشن کی طرح سب پر عیاں ہے۔

انگریزی صحافت میں جس اخبار کو “روشن خیالی کا سرخیل” کہا جا سکتا ہے وہ”ڈیلی ٹائمز ہے۔ یہ اخبار جمعہ کو بچوں کے لیے خصوصی میگزین “Wikkid” کے نام سے نکالتا ہے جس میں “Celeb Solution: Anoushey Knows Best” کے نام سے ایک سلسلہ چلتا ہے جس میں بچوں کے الجھنوں کے مسائل بیان کیے جاتے ہیں۔

پاکستان میں جہاں اخبارات و رسائل پڑھنے کا رحجان بہت کم ہے وہیں ہر اخبار کسی مخصوص طبقے کی نمائندگی کرتا دکھائی دیتا ہے اور اس کی جھلک قارئین کے خطوط میں دکھائی دیتی ہے۔ یہی جھلکیاں بچوں کو انوشہ کو بھیجے گئے خطوط میں بھی واضح ہوتی ہیں لیکن سوال چاہے جیسا بھی ہو خاتون کو انفرادی حیثیت میں اور اخبار کو اپنی ذمہ داری کا احساس کرتے ہوئے ننھے ذہنوں میں زہر نہیں اُگلنا چاہیے۔ یکم اگست 2008ء کو Wikkid کی اشاعت میں بھی یہ سلسلہ باقاعدگی سے آیا اور میری نظر سے گزرا۔ پہلا سوال پڑھ کر جھٹکا سا لگا لیکن ساتھ تجسس پیدا ہوا کہ جواب کیا ہوگا؟ ملاحظہ کیجیے، اصل اخبار کا اسکین شدہ ٹکڑا:

کیا کسی موقر جریدے کو یہ زیب دیتا ہے کہ وہ مذہبی و اخلاقی اقدار کو پامال کرنے ننھے ذہنوں کو پراگندہ کرے؟ چاہے وہ سوال کرنے والا غیر مسلم ہو اور جواب دینے والی بھی لیکن کم از کم اس امر کو تو ملاحظہ کرنا چاہیے کہ ہماری بیشتر آبادی مسلمان ہے اور اسلام میں 6 سال کی عمر کے بعد بچوں کے بستر بھی الگ کر دینے کا حکم ہے تو یہ خاتون کس بنیاد پر سوال کا یہ “عالمانہ جواب” دے رہی ہیں۔ میں نے یہ موضوع اس لیے نہیں چھیڑا کہ میری اس صدائے احتجاج پر ڈیلی ٹائمز اپنی پالیسیاں بدل دے گا بلکہ اس لیے کہ وہ لوگ جو لاعلمی میں صرف بچوں کی انگریزی “بہتر” بنانے کے لیے گھروں پر انگریزی اخبارات لگواتے ہیں، یہ اخبارات ان کے بچوں کی کیا ذہن سازی کر رہے ہیں؟ آج سے 6 سال قبل روزنامہ جنگ سے وابستہ معروف انگریزی اخبار The News بھی بچوں کے صفحات پر حضرت ابراہیم علیہ السلام سے وابستہ بائبلی قصہ شائع کرنے کا کارنامہ انجام دے چکا ہے جس میں اسماعیل علیہ السلام کی جگہ اسحاق علیہ السلام کی قربانی کا ذکر تھا۔ اس واقعے کو درج کرنے سے بڑا ظلم یہ کہ اس میں حضرت ابراہیم علیہ السلام کی کارٹونک تصویر بھی شائع ہوئی۔ اس پر بعد ازاں اخبار نے معافی ضرور مانگی اور ذمہ دار افراد کی شاید سرزنش بھی ہوئی لیکن اس تحریر کے نتیجے میں کتنے ذہنوں تک غلط معلومات پہنچی اور انبیاء کی توہین ہوئی اس کا شاید کسی کو اندازہ نہ ہو۔

میری گزارش ہے کہ آج کے پرفتن دور میں اپنے بچوں کو فتنوں سے بچانے کے لیے ان کی سرگرمیوں کو مانیٹر کریں۔ انٹرنیٹ پر وہ کس قسم کی ویب سائٹس ملاحظہ کرتے ہیں، ان کی نصابی کتب میں کیا تعلیم دی جا رہی ہے، وہ کس قسم کا لٹریچر پڑھ رہے ہیں، کس قسم کی محفلوں میں بیٹھ رہے ہیں اور گھر میں جو اخبارات و رسائل آتے ہیں ان میں کس قسم کا مواد ہے جو ان کے زیر مطالعہ ہے۔ یقین جانیں اگر ہم نے ان امور پر آج دھیان نہیں رکھا تو کل سوائے پچھتاوے کے ہمارے پاس کچھ نہ ہوگا۔

]]> http://abushamil.urdutech.com/anoushey-knows/feed/ http://abushamil.urdutech.com/paris-masjid/ http://abushamil.urdutech.com/paris-masjid/#comments Mon, 28 Jul 2008 07:32:27 +0000 ابوشامل http://abushamil.urdutech.com/?p=133 ShareThis

“لسٹ دکھاؤ کہاں ہے؟”

“ڈیزل میں 10 روپیہ بڑھ گیا وہ نئیں دیکھتا تم؟”

“فی سواری 4 روپیہ بڑھانا کہاں کا انصاف ہے؟”

“ام کیا کرے؟ ام نے تو ڈیزل پر پیسہ نئیں بڑھایا”

“اترو نیچے، اترو!!!!”

یہ وہ صدائیں ہیں جو گزشتہ دو روز سے پبلک ٹرانسپورٹ میں سفر کے دوران کانوں میں گونج رہی ہیں بلکہ کئی بار تو کان پھاڑ قسم کی ہوتی ہیں۔ اور یہ پٹرول و ڈیزل کی قیمتوں میں حالیہ اضافے کے بعد ٹرانسپورٹرز کی ہڑتال اور مطالبات کو تسلیم کیے جانے کے بعد معمول کا حصہ بنتی جا رہی ہیں۔

حالانکہ موجودہ حکومت روٹی، کپڑا اور مکان کا نعرہ لگا کر میدان میں آئی ہے اور انتخابات میں گزشتہ حکومت کے جو “مظالم” گنوا کر عوام سے ہمدردی کے ووٹ بٹورے گئے ان میں سرفہرست مہنگائی کا مسئلہ تھا اور اس مسئلے کی بنیادی وجہ گزشتہ دور حکومت میں پٹرولیم مصنوعات کی قیمتوں میں ہونے والا روز بروز اضافہ تھا لیکن “عوام دوست” حکومت کے انتخابات جیتنے کے بعد سے اب تک 7 مرتبہ پٹرولیم مصنوعات کی قیمتوں میں مجموعی طور پر 61 فیصد سے زائد اضافہ ہو چکا ہے۔ فروری 2008ء کے اختتام پر پٹرول کی قیمت 53 روپے 70 پیسے تھی جو اب 86 روپے 87 پیسے پر پہنچ چکی ہے۔ اس ریکارڈ قیمت پر پہنچنے کے لیے ریکارڈ قدم اٹھا کر بیک وقت 11 روپے 18 پیسے اضافہ کیا گیا۔

اسی عرصے کے دوران ڈیزل کی قیمت میں 73، مٹی کے تیل کی قیمت میں 65 اور ایچ او بی سی کی قیمت میں 48 فیصد اضافہ کیا گیا۔ پٹرولیم مصنوعات میں اضافہ ایک “منی بجٹ” کی حیثیت رکھتا ہے خصوصاً ڈیزل اور مٹی کے تیل کی قیمت میں اضافے کے نتیجے میں عوام براہ راست متاثر ہوتی ہیں کیونکہ ڈیزل سے وہ تمام اقسام کی ٹرانسپورٹ رواں دواں رہتی ہیں جو عوام استعمال کرتی ہے اور مٹی کا تیل ملک کے کئی علاقوں میں ایندھن کے طور پر استعمال کیا جاتا ہے۔

بہرحال حالیہ اضافے کا نتیجہ اگلے ہی روز ہڑتال کی صورت میں دیکھنا پڑا اور مجھ جیسے پبلک ٹرانسپورٹ استعمال کرنے والے افراد دفتر پہنچنے میں ناکام رہے یا پھر دیگر ذرائع سے دفتر پہنچنے کی کوشش کرتے رہے۔ ہڑتال کے اگلے روز متوقع طور پر شہر کراچی میں جابجا کنڈیکٹروں اور سواریوں کے درمیان تلخ کلامی اور ہاتھا پائی کے واقعات پیش آئے جس کی بنیادی وجہ پبلک ٹرانسپورٹ کے کرایوں میں من مانا اضافہ تھا جبکہ حکومت کی جانب سے اس ضمن میں کوئی فہرست جاری نہیں کی گئی. اسی تلخ کلامی کی جھلکیاں پبلک ٹرانسپورٹ استعمال کرنے والے تمام افراد روزانہ ملاحظہ کر رہے ہوں گے۔

اب صرف فہرست کی صورت میں “پروانہ” جاری ہونے کا انتظار ہے، عوام ذہنی طور پر ایک اور کاری وار کے لیے تیار ہو چکے ہیں۔

Beijing 2008

4 سال بعد دنیا کی نظریں ایک مرتبہ پھر سب سے عالمی کھیلوں کے مقابلوں “اولمپکس” پر مرکوز ہیں اور اس مرتبہ سب کی توجہ کا مرکز چین کا دارالحکومت بیجنگ ہے جہاں اگلے ماہ اولمپکس 2008ء کا آغاز ہو رہا ہے۔ بیجنگ نے 2001ء میں اولمپک کھیلوں کی میزبانی کا مقابلہ اپنے نام کیا تھا اور اس کے بعد انہوں پیچھے مڑ کر نہ دیکھا اور سخت محنت کے بعد ان عالمی کھیلوں کے شاندار انعقاد کے لیے بھرپورتیاری کی جس کا مظہر بیجنگ اور دیگر مقامات پر اولمپک کھیلوں کے تیار کی گئی شاندار عمارات و کھیل کے میدان ہیں۔ بیجنگ کھیلوں کے لیے جس زور و شور سے تیاریاں کی گئی ہیں وہ اسے تاریخ کا عظیم ترین اولمپک بنانے کے لیے کافی ہیں۔

بیجنگ اولمپک کا آغاز 8 اگست کو ہوگا اور یہ 24 اگست تک جاری رہیں گے۔ ان عظیم کھیلوں کا چین میں انعقاد اس امر کا اظہار ہے کہ عالمی سطح پر چین کا مقام تسلیم کر لیا گیا ہے۔

دوسری جانب چین نے عظیم الشان تعمیراتی شاہکار قائم کر کے یہ ظاہر کیا ہے کہ وہ اقتصادی ترقی کی معراج کی جانب گامزن ہے۔ بیجنگ نیشنل اسٹیڈیم، بیجنگ نیشنل انڈور اسٹیڈیم، بینل نیشنل ایکویٹکس سینٹر، اولمپک گرین کنونشن سینٹر، اولمپک گرین اور بیجنگ ویوکسونگ کلچر اینڈ اسپورٹس سینٹر تعمیرات کے شاہکار ہیں۔ ان میں ماسٹر پیس بیجنگ کا مرکزی نیشنل اسٹیڈیم ہے جو کسی پرندے کے گھونسلے جیسا لگتا ہے اور اس کی عرفیت بھی “bird nest” ہے۔ اس میں 80 ہزار افراد کی گنجائش ہے۔ افتتاحی و اختتامی تقریبات اسی اسٹیڈیم میں منعقد ہوں گی۔

بیجنگ اولمپک میں 205 ممالک کے کھلاڑی شرکت کر رہے ہیں جو 28 کھیلوں میں اپنے ملک کےلیے تمغوں کے حصول کی دوڑ میں مصروف دکھائی دیں گے۔

ایک جانب جہاں لاکھوں تماشائی یہ کھیل میدانوں میں ملاحظہ کریں گے وہیں دنیا بھر کے 4 ارب افراد اسے ٹیلی وژن پر بھی ملاحظہ کر سکیں گے تو ہم بھی منتظر ہیں صرف دو ہفتے بعد تاریخ کے اس عظیم ترین ایونٹ کے لیے اور چین کی شاندار تیاریوں کو عملی صورت میں ملاحظہ کریں گے اور دیکھیں گے کہ چین پہلی مرتبہ اولمپک کھیلوں میں سب سے زيادہ تمغے جیتنے کا اعزاز حاصل کر پاتا ہے یا نہیں؟

الف۔ کھیل کے قوانین جوابات دیتے وقت ارسال کرنا ہوں گے۔

ب۔ جس نے آپ کو اس کھیل سے منسلک کیا ہے، اُسکی تحریر کا حوالہ دینا لازمی ہے۔

ج۔ سوالات کے آخر میں آپ مزید پانچ لوگوں کو اِس کھیل سے منسلک کریں گے، اور اس کی اطلاع متعلقہ بلاگ پر نئی تحریر میں تبصرہ کر کے دیں گے۔

سوالات:

س1۔ ونڈوز یا لینکس؟

دونوں

س2۔ ہالی ووڈ یا بالی ووڈ؟

Hollywood

س3۔ پیپسی یا کوک؟

کوک

س4۔ سیب یا انگور؟

انگور

س5۔ کراچی یا لاہور؟

کراچی

س6۔ پاپ میوزک یا راک؟

ان دونوں میں سے تو کوئی نہیں

س7۔ چائے یا کافی؟

چائے

س8۔ عدنان سمیع یا عاطف اسلم؟

دونوں نہیں

س9۔ نہاری یا حلیم؟

حلیم

س10۔ لوو میریج یا ارینجڈ؟

ارینجڈ کی تو “گل” ہی اور ہے

س11۔ فورمز یا بلاگ؟

فورمز

س12۔ نواز شریف یا آصف زرداری؟

چھڈو جی

س13۔ دوست یا کزنز؟

دوست

س14۔ کرکٹ یا فٹ بال؟

فٹ بال

س15۔ پرسکون یا پریشان؟

ہمہ وقت پریشان

اب میں ان سوالوں کا بوجھ ان 5 لوگوں پرڈالتا ہوں۔

محب علوی

عارف انجم

شاکر عزیز

ساجد اقبال

قدیر احمد

ہم نے بھی جدید و قدیم کے حسین امتزاج کے حامل اس شہر کا سفر کرنے کی ٹھانی اور چند روز کے لیے کراچی کی مصروفیتوں اور تیز رفتار زندگی سے کنارہ کشی اختیار کر کے طویل تھکا دینے والے سفر اور راستے میں بھانت بھانت کی نگریاں دیکھنے کے بعد بالآخر داتا کی نگری پہنچے۔

آرام کے بعد اگلے روز گھومنے کے لیے پہلی نظرِ انتخاب اس عظیم عبادت گاہ پر پڑی جو برصغیر میں سطوتِ مسلم کا نشانِ پائیدار ہے جسے بادشاہی یا عالمگیری مسجد کہا جاتا ہے۔ جس کے مینار صدیوں سے اللہ کی کبریائی بیان کرتے آ رہے ہیں اور آج بھی فرزندانِ توحید اس میں ربِ ذوالجلال کے حضور سربسجود دکھائی دیتے ہیں۔ منصوبے کے تحت چند گھنٹے مسجد میں گزارنے کے بعد نماز ظہر ادا کرنی تھی لیکن ۔۔۔۔۔۔۔۔۔۔۔ مسجد میں داخل ہوتے ہی لاہوریوں کی “زندہ دلی” کا سارا تاثر ختم ہو گیا بلکہ “زندہ دلی” کی جدید تعبیر کے مطابق، قائم ہوگیا۔ مسجد کے صحن میں جا بجا شوخ رنگوں کے کپڑوں میں ملبوس خواتین گھومتی پھرتی نظر آئیں، ہمیں خواتین کے مسجد آنے پر کوئی اعتراض نہیں لیکن جس طرح وہ حجاب و پردے سے بے نیاز گھوم رہی تھیں وہ کسی عام عبادت گاہ کے بھی شایان شان نہ تھا یہ تو پھر عالمگیری مسجد تھی۔ مسجد کے صحن میں موجود حوض تک پہنچے تو اگلا “منظر” وہاں موجود تھا، جینز اور شرٹ میں ملبوس اور دوپٹے سے بے نیاز ایک خاتون اپنے اہل خانہ کی تصاویر کو کیمرے کی آنکھوں قید کر رہی تھیں۔ اب اِدھر اُدھر جو نظر دوڑائی تو مسجد میں کئی جوڑے راز و نیاز میں مصروف دکھائی دیے۔ آنکھیں اس سے زيادہ مسجد کی بے حرمتی کی تاب نہ لا سکتی تھیں فوراً واپسی کا قصد کیا اور حضوری باغ کے سامنے حکیم الامت علامہ محمد اقبال کے مزار پر حاضری دیتے اور اہلیان لاہور کا نوحہ پڑھتے ہوئے قلعۂ لاہور میں داخل ہوگئے۔ قدیم نوادرات و عمارات و تعمیرات سے اس مقامِ عبرت انگیز کی اہمیت کا اندازہ ہوا۔ جہاں کسی زمانے میں پرندے کو پَر مارنے کی اجازت نہ تھی، وہ راہداریاں جہاں صرف خاص الخاص اور خانوادۂ شاہی کے افراد کو قدم رکھنے دیا جاتا تھا آج وہاں “کلّو قصائی” اور “اللہ رکھے” کو بھی محض 5 روپے میں جانے کی اجازت تھی۔ وہ دروازے جہاں سے ظل الٰہی کے علاوہ کوئی گزر نہ سکتا تھا، اگر کوئی ایسی جسارت کرتا تو جسم سر کے بوجھ سے آزاد کر دیا جاتا، وہاں سے یہ ناچیز کئی مرتبہ گزر گیا۔ آہ! دیکھو مجھے جو دیدۂ عبرت نگاہ ہُوں۔

بہرحال عالمگیری مسجد اور مینار پاکستان کے درمیان تین صدیوں کی مسافت (بقول مختار مسعود) طے کر کے اس جدید یادگار کے پاس پہنچے جو اس وقت تزئین و آرائش کے مراحل سے گزر رہی تھی اور اوپر جانے کی اجازت نہ تھی۔ مینار کے ساتھ ہی ایک باغیچے کا چند روز قبل ہی افتتاح ہوا تھا لیکن وہاں لوگوں نے وہ “گندِ عظیم” مچا رکھا تھا کہ نیچے بچھا سبزہ بجائے سبز کے کینو کے چھلکوں کی بہتات کے باعث نارنجی نظر آ رہا تھا۔ 10 منٹ کی کوششوں کے بعد مجھے اپنے کھائے گئے کینوؤں کے چھلکے پھینکنے کے لیے ایک ٹوکری دکھائی دی۔ باہر نکلے تو چند لحظوں کے لیے “بدبوؤں کے باسی” بن گئے اور اس بو کے بارے میں تو یہاں لکھا بھی نہیں جا سکتا کہ کس چیز کی تھی۔

لاہوریوں کی زندہ دلی اور اس شہر کی خوبصورتی کے جو چرچے اور قصے یہاں سے سن کر وہاں گئے تھے ان کا اثر صرف چند لحظوں میں چکنا چور ہو گیا۔ یا شاید زندہ دلی کی تشریح ہمارے سمجھ میں نہ آ سکی تھی؟

تو جناب سب سے پہلے اس کھیل کے قوانین

ا) کھیل کے قوانین جوابات دیتے وقت ارسال کرنا ہوں گے ۔
ب) جِس نے آپ کو اس کھیل سے منسلک کیا ہے، اُسکی تحریر کا حوالہ دینا لازمی ہے ۔
ج) سوالات کے اخیر میں آپ مزید پانچ لوگوں کو اِس کھیل سے منسلک کریں گے، اور اس کی اطلاع متعلقہ بلاگ پر نئی تحریر میں تبصرہ کر کے دیں گے ۔

سوالات اور جوابات

1) اِس وقت آپ نے کِس رنگ کی جرابیں پہنی ہوئی ہیں؟

سردی گرمی خزاں بہار، چاہے کچھ ہو دفتر آنے کے لیے جرابیں پہننی پڑتی ہیں اور اس وقت سیاہ رنگ کی جرابیں پہنی ہوئی ہیں۔

2) کیا آپ اس وقت کچھ سُن رہنے ہیں؟ اگر ہاں تو کیا؟

ابھی دفتر پہنچا ہوں اور دفتر میں کام کرنے والی خواتین کی محفل سے بھن بھن کی آوازیں آ رہی ہیں (نجانے کس کی غیبت ہو رہی ہے؟)

3) سب سے آخری چیز جو آپ نے کھائی تھی کیا تھی؟

ہاں وہی ناشتہ! پراٹھہ، انڈہ اور چائے

4) سب سے آخری فلم کونسی دیکھی ہے؟

ہممممم آج اندازہ ہو رہا ہے کہ کوئی فلم دیکھے بہت عرصہ ہو گیا ہے، شاید آخری مرتبہ بچوں والی کوئی فلم دیکھی تھی ڈاکٹر ڈولٹل 1

5) آپ کا پسندیدہ قول کیا ہے؟

مرد کا ایک مرتبہ گھر کے اندر اور عورت کا گھر سے باہر دل لگ گیا تو انہیں پلٹانا سب سے مشکل ہے

6) کل رات بارہ بجے آپ کیا کر رہے تھے؟

کمپیوٹر پر نصب کردہ نیا گیم کھیل رہا تھا UEFA Euro 2008

7) کِس مشہور شخصیت زندہ یا مردہ سے آپ مِلنا چاہیں گے؟

یہ سب سے مشکل سوال ہے، اتنی شخصیات سے ملنے کی خواہش ہے کہ ہر شخصیت پہ دم نکلے۔ بہرحال حکیم الامت علامہ اقبال سے ملنے کی بہت تمنا ہے۔

غصہ میں اپنے آپ کو پرسکون کِس طرح کرتے ہیں؟

پرسکون اسی وقت ہوتا ہوں جب غصہ اتر جاتا ہے، ویسے میں بذات خود کوشش نہیں کرتا بلکہ دیگر افراد میرے غصے کو کم کرنے کی کوشش کرتے ہیں

9) فون پر سب سے آخر میں کِس سے بات ہوئی؟

کل رات کو ایک دوست سے

10) آپ کا پسندیدہ تہوار کونسا ہے؟

بلاشبہ سب سے زیادہ مزا عید الاضحٰی پر آتا ہے۔

کھیل کے قوانین کے مطابق 5 دیگر بلاگرز کو زبردستی اس کھیل میں گھسیٹنا ہے تو میں دھکا دیتا ہوں ان بلاگرز کو:

راہبر، اظہر الحق، راشد کامران، نعمان اور اجمل صاحب

یہ اسی کتاب “معالم فی الطریق” کے اردو ترجمہ “جادہ و منزل” کے میں کتاب کے وہ تعارفی الفاظ ہیں جو کتاب اور مصنف کے تعارف کے ضمن میں ادا کیےگئے ہیں۔ آج سے کچھ عرصہ قبل جب اس کتاب کا مطالعہ کیا تو اسی وقت تہیہ کر لیا کہ اس کتاب کو برقیانے کا کام ضرور کروں گا۔ ماہ اپریل کے اوائل میں اردو محفل پر اس سلسلے میں گفتگو کا آغاز کیا اور دو انتہائی شفیق دوستوں نے اس ضمن میں مدد کی یقین دہانی کرائی اور بعد ازاں عملی طور پر اس میں حصہ لیا اور صرف 25 دنوں کے عرصے میں 436 صفحات کی اس کتاب کی کمپوزنگ کا مرحلہ طے پا گیا۔

اب اس کے تکنیکی و پروف ریڈنگ کے اہم مراحل باقی تھے۔ اس پوری کتاب کو ایک فائل میں بند کرنا گویا “دریا کو کوزے میں سمانا” تھا اس لیے اس کی تیاری کے دوران پوری کوشش رہی کہ اس فائل کا حجم کم سے کم رہے اور اسی لیے صرف ایک فونٹ “نفیس ویب نسخ” کااستعمال کیا گیا ہے اور قرآنی آیات کے لیے خوبصورت سے خوبصورت فونٹس کی موجودگی کے باوجود کسی دوسرے فونٹ کا استعمال نہیں کیا گیا۔ نفیس ویب نسخ کو بھی اس فائل کے اندر embed کر دیا گیا ہے تاکہ وہ صارفین جن کے کمپیوٹر پر یہ فونٹ نصب نہیں، بھی اس کتاب سے استفادہ حاصل کر سکیں۔

مجھے امید ہے کہ تمام دوستوں کو یہ کاوش پسند آئے گی لیکن بحیثیت انسان غلطی ہر شخص سے ہو سکتی ہے اس لیے اس برقی کتاب میں ہجے اور املاء کے علاوہ خاص طور پر کچھ تکنیکی غلطیاں ضرور ہوں گی اور وہ تمام افراد جن پر یہ غلطیاں ظاہر ہوں اس کے بارے میں مجھے مطلع کریں تو میں بہت مشکور ہوں گا اور اس غلطی کو فوری طور پر درست کردوں گا۔

آخر میں تمام اراکین سے التماس ہے کہ اس کتاب کے مصنف سید قطب شہید اور مترجم خلیل احمد حامدی صاحب کے درجات کی بلندی کے لیے دعا کریں اور دعاؤں میں اس ناچیز اور کتاب کو برقیانے میں مدد دینے والے دیگر ساتھیوں کو بھی یاد رکھیں

“جادہ و منزل” کتاب یہاں سے ڈاؤن لوڈ کی جا سکتی ہے:

جادہ و منزل (مکمل برقی نسخہ)